政情：金鈴搭高鐵失魂 拎漏手袋險「雙失」
有「金槌拍賣官」之稱嘅香港湖北社團總會副會長金鈴一向精靈聰慧，不過早幾日佢喺上海搭高鐵期間，一時失魂將隨身手袋遺忘咗喺候車室，上車之後先猛然醒起，結果要用跑百米衝刺嘅速度飛奔返去搵，過程萬分驚險。事後講起，佢都笑稱可以話係人生最甩轆嘅事件。
同手足傾偈太投入
金鈴話，今次去杭州係同班情同手足嘅老友聚會，候車期間大家喺手機群組不停傾偈。可能佢傾得太開心、太投入，一時分心，差唔多夠鐘就咁拖個篋入閘去月台上車，上咗車冇耐搵唔到手袋，先記起可能留低咗喺候車室。佢話，當時距離開車只有十二分鐘，結果佢就「踩盡油」變摩打腳咁，一路逆向奔跑，好彩手袋仲安然放喺原處。
手袋喺人來人往嘅地方竟然冇被拎走，金鈴都未有時間多諗自己有幾好彩，即刻又飛奔返去月台，終於趕得切跳上車，甫坐定高鐵就即刻開動喇。金鈴笑笑口話，諗番件事真係好驚險，當時最壞嘅情況係手袋搵唔返，而行李又隨高鐵而去。如果係咁，豈不是變「雙失」？