中環出更：唔做「隱形政助」何翠萍獻身同議員密斟
早前民政事務局局長政治助理黎穎瑜被鬧爆「冇影」，而財經事務及庫務局政助楊寶蓮同發展局政助馮英倫亦都被立法會議員批評過唔見人同踢唔郁。尋日立法會開會，一向都較少現身立法會嘅財政司司長政治助理何翠萍（Apple）就突然出現，仲同多名議員打招呼，唔通佢怕好似其他政助咁，畀人話係「隱形」政助﹖
賣口乖：辛苦你喇
立法會呢兩日審議政府財政預算案，點知前日就因開會法定人數不足流會。有指係建制派「太安心」冇戰意，加上臨近復活節，部分議員已離港，所以甩晒轆，好彩之前修改咗《議事規則》，前日傍晚已可復會。唔知係咪流會引發危機感，尋日朝早八時許，Apple已經喺立法會會議廳前廳外守候，一見到建制派議員就主動「獻身」，又同議員講其上司財政司司長陳茂波已經到咗，仲賣口乖話︰「辛苦你喇」、「幫幫手」。
相比其他政助，Apple較少現身立法會，平日亦少見咁主動同議員攀談，相信都同前日流會有關。政助作為政府與議會溝通嘅橋樑，平日都應該同議員多啲溝通，流會後先識現身，唔怪得啲政助成日畀人閙「踢一腳、郁一下」喇。
卓妮