阿健與阿康同為物流業的工友，他們每天要搬運不同貨物，需要大量的體力勞動。阿健問：「阿康，今日收工之後有冇興趣一齊打波呀？」阿康回答：「平時返工仲做唔夠咩，日日搬咁多貨，已經夠晒運動啦！」
阿健解釋：「返工勞動又點同做運動呢。之前睇職安局出版嘅《綠十字》，入面提到日常工作嘅勞動未必可以好似休閒運動咁，幫助我哋改善身體健康。」阿康一臉疑惑道：「吓，大家都係走嚟走去，郁吓啲手手腳腳，差唔多啫。」
阿健回答道：「嗱，你咁諗就錯喇。做休閒運動，例如球類活動，活動強度一般都較高，運動時心跳會較快，足夠改善我哋嘅心肺功能同新陳代謝。相反，日常工作時，雖然勞動多，但強度就未必能夠達到足夠嘅心率。以中等強度體能活動嚟計，運動時心率範圍應為最高心率（即220-年齡）嘅百分之六十五至七十五。」
阿健補充道：「另外，以打籃球為例，動作幅度會較大而且姿勢較不受限制，運動時會用到唔同肌肉群。我哋平時返工搬野就需要經常重複、維持同一姿勢，固定使用某一群肌肉，反而容易造成勞損。所以，平時喺開工前同空閒時，我都會做吓伸展運動，鬆弛吓筋骨。」
阿康：「你咁講又好似幾啱。諗諗吓，平時一班人打完波，個人心情都好啲，壓力都冇晒。你哋一陣去邊度打波，預埋我啦。」
職業安全健康局
www.oshc.org.hk