政情：立會考察長三角 民主派集體退團
立法會長三角考察團將喺月底出發，但七名已報名嘅民主派議員尋日公布決定集體退團！會計界梁繼昌解釋退出係因為最近嘅社會氣氛，包括政府決意要修訂《逃犯條例》，令民主派議員覺得同政府失去互信基礎，但係作為副團長嘅葛珮帆（EQ）就認佢哋嘅退團嘅原因只係一個無謂借口。
民主黨（白鴿黨）黃碧雲更透露，曾經向政制及內地事務局提出要求，基於近來各方熱議修例，可否喺考察團中安排同中央官員會面，可惜至今仍未獲回覆，所以決定唔去。至於考察團首日行程會應教育界議員葉建源去上海復旦大學，葉就話覺得修例重要過睇經濟發展，呢個時候會留喺香港跟進議題。
葛珮帆認為原因無謂
EQ認為泛民唔應該退出，希望議員勿以政治凌駕經濟及民生發展，而要一單還一單，加上四日考察唔會影響《逃犯條例》嘅修訂，所以只係一個無謂借口，佢就話感到可惜。
立法會秘書處回覆話，已付嘅開支一如以往的安排，退出考察嘅議員需承擔有關費用，並且唔可以喺有關議員嘅海外職務訪問帳目中扣除。