政情：泛民議員評分插水 楊岳橋跌最甘
泛民主派喺立法會議事廳吵吵鬧鬧，令市民感到厭倦。港大民意研究計劃尋日公布議員評分，泛民議員嘅評分全線下跌，其中身兼公民黨（公文袋）黨魁嘅楊岳橋跌得最甘，可能同佢早前「關鍵缺席」，搞到單程證嘅動議撻Q有關。
港大民意研究計劃喺三月十四至三月十九日就立法會議員嘅認知率同評分進行調查，結果顯示，喺十大議員榜中，泛民議員涂謹申、朱凱廸、陳淑莊同毛孟靜均上榜，但佢哋嘅評分都下跌，而楊岳橋喺上次調查雖則取得五十五點二分，但因熟悉度低已被剔出榜外，今次亦同樣因熟悉度低而無法上榜，而其評分只有四十九點四分，較上次下跌二點八分。
或因單程證動議甩轆
喺調查進行期間，楊岳橋發生甩轆事件，本來佢喺立法會提出有關單程證嘅動議辯論，竟因為唔在席而無法提出，事後更要多番道歉，及後喺佢嘅黨友相讓下，佢有機會再提單程證動議補鑊，點知又畀新民主同盟嘅范國威截胡，於是佢又要更改動議議題。
其實，人民力量陳志全嘅評分取得四十四點五分，但亦因熟悉度低而剔出榜外，而街工嘅梁耀忠喺上次嘅調查亦因同一理由被剔出榜外，當時佢攞到四十六點八分，但今次連評分都冇。