政情：肥彭仲當自己港督豬噏當秘笈
香港回歸近二十二年，末代港督彭定康（肥彭）依然陰魂不散，對香港事務指指點點。二○一四年九月爆發違法佔領行動（佔中），法庭尋日終於就佔中案裁決，佔中發起人戴耀廷、陳健民同朱耀明等九名被告，被法庭裁定罪名成立。唔知係咪得閒得滯，話咁快肥彭又再出嚟亂噏當秘笈，話當局以過時法例提出檢控，案件裁決令社會分裂喎。肥彭早已經唔係港督，如果佢仲在任就話啫，人都唔喺香港，真係講乜都冇用啦！難怪畀人話佢已冇代表性，講嘢根本係廢話，「一啲都唔靈」喇！
佔中案尋日裁決，戴耀廷等九名被告被判罪成，有報道就引述肥彭嘅回應，話當大部分人都認為香港政府應該係團結社會時，政府卻用過時嘅普通法控罪，起訴一四年嘅政治事件，尋求報復，令社會嚴重分裂。
有政界中人就翻肥彭舊帳，話肥彭在任港督時，九六年十月喺港台節目《給香港的信》中，反對反日人士衝入日本駐港領事館，呼籲要守法，但依家就佔中裁決嘅回應，就話違法嘅人合理，簡直係前言不對後語。翻查資料，當年係保釣行動委員會成員衝入日本駐港領事館示威。
指手畫腳 圖搗亂香港
對於肥彭噏三噏四，「廿三萬監察」發言人王國興話香港係中國不可分割嘅一部分，肥彭作為末代港督，冇理由到依家都仲對香港嘅嘢指手畫腳，干涉香港內政，形容肥彭係「極錯」。佢又話肥彭已經冇代表性，所以佢嘅言論「根本係廢話，一啲都唔靈」。
王又批評肥彭喺度自打嘴巴、自相矛盾。事關肥彭同班泛民成日話要尊重司法，依家法庭就佔中案作出裁決，佢就話裁決係分裂社會，質疑肥彭係干預司法。佢仲認為肥彭嘅言論正正反映咗有外國勢力想喺香港搵代理人，搗亂香港。
唔止王鬧爆肥彭，時事評論員陳雲生亦批評肥彭作為一個過氣港督，其言論並唔恰當，又指肥彭同香港嘅關係早喺二十一年前已經完結，質疑肥彭嘅言論旨在擾亂香港社會，話佢先至係挑動社會矛盾咁話。佢仲建議肥彭，如果真係有心關心社會，就先處理好佢哋英國人嘅事，例如近期嘅英國脫歐僵局喇！
不在其位 講乜都唔靈
正所謂不在其位就不謀其政，肥彭仲喺香港就話啫，佢已經唔係港督，人亦都唔再留喺香港，真係講乜都唔靈，講乜都冇用，呢啲咪就叫豬噏囉！