中環出更：修逃犯例重要時刻 鄭若驊訪歐8日
政府擬就移交逃犯修例，咁重要嘅事，外界有好多意見同疑團，相關嘅問責官員正路都應該坐定定喺香港幫手促成事件。點知律政司司長鄭若驊就走去外訪歐洲多國，聲稱推廣香港嘅法律及爭議解決服務喎，竟然懶理移交逃犯修例，完全係唔識分輕重呀！
鄭若驊喺聽日出發外訪，先後訪問法國巴黎、盧森堡、海牙同維也納，期間會出席唔同嘅活動，推廣香港嘅法律及爭議解決服務，又會拜訪多個法院、政府部門同國際組織等，喺十八日奧地利維也納結束行程。
過去14次外訪 花逾136萬
其實，政府早前已經將修訂逃犯條例嘅相關草案提交立法會，稍後仲會成立草案委會審議，而喺呢啲咁重要嘅時刻竟然外訪，睇嚟佢係覺得呢個行程仲緊要過就移交逃犯修例喎。
翻查資料，佢由上任至今年二月共外訪咗十四次，平均每個月都有外訪行程。十四次外訪嘅開支逾一百三十六萬元，平均每次九萬七千元。今次又去歐洲八日，唔知埋單又要幾多錢呢？
卓妮