中環出更：摩斯密碼都識 貝鈞奇打電報冇難度
依家手提電話咁方便，但昔日要通訊就好困難啦，香港中華出入口商會（中出）副會長貝鈞奇尋日喺傳媒茶敍時，講起以前行船時，負責打電報，時至今日都仲記得點打摩斯密碼，仲即場模擬點打添！真係好記性！
同場嘅副會長黃英豪就講起對科技一直都有興趣，律師樓以前都有電報機，八十年代覺得周街可以打電話好有型，於是花兩萬幾蚊買咗部勁大部座枱可以攞出街嘅手提電話，嗰部電話講咗幾分鐘就會好熱，之後一路買埋大哥大，又試過用三萬蚊買咗部揭蓋式嘅手提電話添！
講番今次茶敍，主要介紹中出來年重點活動，包括每年都會舉辦嘅「進出口企業大獎」，會長林龍安將會係評審之一，佢話希望獎項可以幫助青年創業喎。至於副會長許華傑（Michael）就話大獎一向好公平，就算唔係中出會員，都有機會攞獎，鼓勵大家參加喎。
許華傑返廣州睇老爺車
講起青年創業，Michael話近日去過廣州市白雲區考察青年創新嘅產業，喺當地行行吓街都見到有啲唱K嘅應用程式，已經同實體店結合，有啲受歡迎嘅後生仔每個月咁唱都賺到幾萬蚊收入（口架）！咁佢兩個仔又會唔會搞吓啲網上創業呢？佢話阿仔都有拍吓片、寫吓嘢擺上網，但仲細個，未適合創業住。另外，佢仲特別喺廣州抽時間去睇一間私人老爺車博物館，入面有百幾部老爺車，部分連車廠本身都冇貨添！
轉個頭又見到副秘書長楊靜，佢話近日中出搞咗個活動好受歡迎，預定百五張記者證都用晒，要即場印記者證添，搞得成功，相當開心咁話。
卓妮