政情：羅冠聰女友 袁嘉蔚改名博洗底？

羅冠聰（左）嘅女友袁嘉蔚（右）已退出香港眾志。

愚人節貼文 新名「田灣袁」

羅冠聰依家喺現任立法會議員區諾軒嘅辦事處做兼職，而袁嘉蔚就係幫區諾軒做地區工作。袁嘉蔚尋日喺社交網站Facebook上載咗張相，就係填表格申請改名，改做田灣袁。點解？佢貼文話諗咗好耐決定改名，事關喺田灣做地區工作都兩年，除咗「嘉蔚」之外，平時畀街坊叫得最多就係「田灣袁小姐」，叫叫吓有時會變埋田姑娘，所以佢今（尋）日決定去改名做「田灣袁」喎。

• 袁嘉蔚上載咗張相，話決定改名做「田灣袁」。（互聯網圖片）

尋日呢個post出咗之後，好多網友都話「今日係愚人節，開玩笑只能開到中午十二點之前(口架)喳……」另有網友亦話愚人節玩到咁大，仲有網友話「羅生（羅冠聰）情何以堪！」亦有網友留言話「田灣完，唔係愚人節」，有部分網友仲同佢玩埋一份，建議佢不如改做「田灣猿」喇！佢真係改名抑或開玩笑？睇吓有冇後續發展喇！