中環出更：波哥為女士爭取去廁所時間
立法會財務委員會尋日開會，主席陳健波（波哥）主持咗一陣會議，因為另有活動要出席，所以行開咗一陣，會議就交由副主席陳振英接手主持。不過，波哥之後返到會議室，竟然唔係坐番主席位，而係坐喺議員座位，而陳振英一見佢返嚟就宣布會議短休十分鐘，波哥於是對陳振英手指指兼口噏噏，唔通睇唔過眼呢位接班人走唔切？
陳振英就透露，波哥當時問佢點解會短休十分鐘。佢解釋，因為之前主持財委會時只安排五分鐘休息時間，事後畀波哥話佢孤寒，因為女廁廁格數目較少，需要多啲時間去洗手間，而波哥仲話試過畀十五分鐘休息時間咁長添，所以佢今次就攞個中間位畀大家小休十分鐘喇。咁照計波哥應該滿意先係，點解仲手指指兼口噏噏呢？估計係笑陳振英今次終於識做喇。
陳振英仲講到，今次只係佢第二次主持會議，但今次則首次面對爭議性項目，都要交番畀波哥決定幾時劃線，但佢話主持時唔覺辛苦。
卓妮