政情：望毛公仔依偎 張國鈞露冧樣
大家見到乜嘢人會露出一個好冧嘅樣？立法會議員張國鈞（Horace）尋日喺社交網站Facebook上載咗一張相，都係露出一個冧樣，佢又見到乜嘢呢？係一對毛冷製嘅公仔。
堅尼地城海濱長廊打卡
咁奇怪！事關呢對放喺欄杆上面嘅毛公仔依偎看海，幾咁浪漫，相信Horace當時就係想起攬住老婆一齊看海嘅情景，先露出呢副冧樣。佢仲貼文大讚嗰度係運動、攝影、打卡同休閒嘅好去處，叫大家唔好錯過打卡位添！
睇完佢個Post，係咪都覺得好吸引呢！其實Horace所講嘅打卡位就係卑路乍灣海濱長廊，首階段尋日完工，今日早上八時就會開放臨海地段，入口就喺堅尼地城卑路乍灣巴士總站嘅車長休息室旁邊，而海濱事務委員會委員同多名中西區區議員都去咗視察兼先睹為快，而喺長廊嘅欄杆就放咗啲色彩繽紛嘅毛冷公仔，就好似陪住大家睇日落咁。