立法會秘書處一直為每名立法會議員提供一套個人電腦設備，畀議員可以接達秘書處內聯網，以便議員使用有關資訊科技服務，同埋同其他議員及秘書處溝通。不過，隨住立法會唔少服務依家都可以上網使用，唔需要經內聯網，加上唔少議員都可以用自己嘅個人電腦或手機上網，所以秘書處就計劃逐步收番畀議員用嘅電腦設備，到時議員或會冇「腦」用喇！
另外，秘書處文件又指政府已喺二○一七/一八年批出撥款，為議員提升個人電腦工作站及相關軟件，有關工作喺下月中展開，料今年夏季完成。不過如果議員唔再需要秘書處提供嘅電腦同唔更換軟件，可再通知秘書處。
不過，就算議員提升咗秘書處提供嘅個人電腦工作站及相關軟件，都可能唔會用得好耐，因為即使順利連任，秘書處都已計劃最遲二○二四年九月、下一屆立法會結束前，全面收回提供畀議員用嘅個人電腦設備。真係唔知仲花錢提升電腦工作站及相關軟件做咩？
立法會秘書處回覆話，由於嗰批電腦用嘅軟件已屆正常使用平均為五年嘅年限，有需要提升，政府喺過去兩年已撥款四十六萬元畀秘書處，用作更新有關電腦同軟件，而議員交還秘書處嘅電腦，經註銷程序後再交由認可回收商處理。