政情：閨中「蜜會」馬浚偉 龐愛蘭親下廚
沙田區議員龐愛蘭（Scarlett）經常出席唔同活動同其他人交流。日前佢就邀約一名美男子喺閨中「蜜會」，兼親自下廚煮咗兩味餸，兩人一起細談兩個半鐘，最後該名美男子食飽後仲打包拎走，到底邊個咁有福氣？
開估喇，係藝人馬浚偉！問到兩人係咪私下一早認識？Scarlett笑言「應該係識嘅」，憶述一○年出任禁毒常務委員會禁毒教育及宣傳小組委員會主席時，因為要拍攝一套禁毒電影，當時馬浚偉義務教演員演戲留下好印象，至近來兩人喺社交網站聯絡，發現大家嘅辦公室喺同一幢大廈，交換電話後先有日前嘅約會。
龐：好似屋企人咁
因為馬浚偉食齋，Scarlett專程花四十五分鐘行街市，終於買到新鮮金針菜同榨菜返去煮，兩人無所不談，小至家庭大至夢想都有交流。Scarlett直言感覺好似屋企人咁，大讚對方正能量好強。馬浚偉亦喺社交網站留言多謝Scarlett下廚，令佢身心感到養分十足。