政情：廉署新劇 鄭則仕飾許仕仁 探討犯案心路歷程
前政務司司長許仕仁因收受利益，被法庭裁定觸犯包括公職人員行為不當等罪判囚七年半，仍喺獄中服刑。廉政公署新一輯電視劇《廉政行動2019》以該案為藍本，並以《黃金枷鎖》為主題，由影帝鄭則仕飾演政府高官收受利益，探討許仕仁犯案嘅心路歷程。
到馬房酒庫取景
廉署社區關係處總傳媒宣傳創作主任羅香蘭話為咗令劇情更逼真，特別搵咗負責調查許仕仁案嘅執行處前處長余振昌同其他案件調查員搜集資料，以深入了解案件中，包括涉案者嘅人物性格、被捕時反應，同埋身邊人嘅心理狀況等，期間又到訪前高官經常出入嘅馬房同酒庫等地方取景拍攝。羅又形容涉案人嘅處事方式很聰明，更指其「口供是滴水不漏」，因此案件搵咗法證會計師協助調查海外帳戶，最終破案。
廉署執行處首席調查主任杜安琪指公職人員履行職務要向市民負責，其「職位愈高、權力愈大」，市民對其誠信要求亦愈高。呢套劇喺四月六日起，一連五個周六晚上九時半在翡翠台播出。