政情：修訂逃犯例 葉劉拒揸莊 陳克勤或接波

立法會要趕喺七月前完成國歌法本地立法同修訂《逃犯條例》有一定難度，必須爭分奪秒，勢由建制派包攬正副主席以「開快車」通過，而葉劉曾擔任一地兩檢條例草案委員會主席，加上其前局長身份，被視為處理修訂《逃犯條例》嘅最佳人選。葉劉接受傳媒查詢時承認接獲李家超邀請，但因工作繁忙冇時間為由拒絕邀請。

據悉，建制派暫未有議員自動請纓要擔此重任，唔少人認為修例工作係「豬頭骨」，唔係咁易啃得落，而建制派「班長」廖長江已出任國歌法嘅草案委員會主席，今次理應由陳克勤出選主席，但有傳立法會司法及法律事務委員會主席梁美芬亦有意角逐，正積極爭取當中。陳克勤回覆查詢時則指暫未收到邀請。

憂鄭若驊操刀「愈解愈差」 李家超頂上

不過，港府與外地商討簽署移交逃犯協定其實係由律政司同保安局負責，前者着重處理法律差異，後者則為執法合作，但至日前宣布剔除九項罪類都未見兩個部門行「孖咇」，當日問到律政司司長鄭若驊點解冇現身，李家超都只能尷尬答鄭都好關心，兩人有經常開會，律政司有派專員幫手喎。

有知情人士透露，本來有關修例應由鄭若驊「擔大旗」，並早決定諮詢司法及法律事務委員會，皆因鄭醜聞纏身兼政治智慧「零分」，有擔心由佢操刀只會「愈解愈差」，政圈耳語亦狠斥鄭「縮骨」該做唔使做，焗住要由李家超頂上。既然保安局負責修例，就轉向諮詢保安事務委員會，所以嚟緊草案委員會由陳克勤出任主席，都變得更為理所當然嘞！