中環出更：開會駁火 何君堯斥「一舊雲」發緊夢
立法會尋日辯論有關校本管理嘅議案，立法會議員黃碧雲（一舊雲）就議案發言時就提及，如果啲校董好似身兼行政會議成員嘅立法會議員張國鈞（Horace）咁忙，就「開會都唔得閒睇文件啦，有冤情都唔得閒理啦。」結果惹來建制派議員何君堯不滿，話一舊雲可能自己發緊夢、「一舊雲」，質疑點可以話Horace唔睇文件。
何反駁一舊雲時又話，校本管理係有成個法團一齊做，質疑一舊雲講到啲法團好似個個坐喺度發緊夢咁，仲反問一舊雲「點知張國鈞唔係超人啫？人哋日理萬機，但你就日理可能兩部機」更斥責一舊雲唔睇文件，「應該教書嘅時候唔教書，走嚟呢度廢噏」。
黃要求何收回言論不果
一舊雲聽完即嬲爆，批評何不知所謂，係不恰當揣測其意思同抹黑，要求何收回言論。不過何就拒絕，並指一舊雲「真係一舊雲」，批評Horace時並冇基礎。
當時主持會議嘅議員李慧琼就問係咪要求裁決「一舊雲」係侮辱性言詞，但一舊雲就話唔係，係要求裁決何對於佢嘅所有侮辱性發言、不尊重及揣測動機。但何就堅稱從來冇侮辱人，仲話︰「己不自侮別人焉能侮之」。一場口水戰拗咗一輪先終於落幕。
卓妮