中環出更：外訪拗柴孫蔡吐媚怕再着高踭鞋
貪靚係女士嘅天性，唔少女士都會穿着高踭鞋，令自己雙腳睇落修長啲。仁濟醫院總理孫蔡吐媚日前出席活動時就自爆以前都有着高踭鞋，但有次佢着住高踭鞋去中山，就唔小心拗柴，仲搞到要坐輪椅添，自此佢就唔夠膽再着咁高踭嘅鞋喇喎。
孫蔡吐媚話嗰次去中山係出席活動，當時着住咗對吋半嘅高踭鞋，佢上車時不慎拗柴，因為喺外地，所以非常唔方便，最後仲搞到要坐輪椅，仲要做個多月物理治療先好番，真係慘喇！不過，佢都冇從此唔着高踭鞋，只係由吋半改為只着一吋。
講番個活動，當日係仁濟醫院林賴元芳足病診療室擴充後嘅開幕禮，該診療室係由仁濟顧問局委員林煒珊捐助擴建，林煒珊胞弟林孝信同仁濟副主席王賢訊都有到場。林煒珊話佢嫲嫲生前係糖尿病患者，患者會因為服藥而患足病，之前間診療所較細，為咗可以服務多啲有需要人士同埋為嫲嫲做番啲嘢，所以就出錢擴充，故此診療室以嫲嫲個名命名。佢又話診療室會幫足病患者造鞋同鞋墊，希望可以幫到患者。
林孝信自嘲左右腳都斷過
林孝信雖然冇糖尿病，不過就曾經喺做運動時整傷韌帶，要做手術，而佢以前亦試過滑雪受傷，自嘲左腳、右腳都斷過喇！同場嘅仲有新界社團聯會理事長陳勇，佢亦都話有多次腳傷經歷，包括有次踢波時因為跑得太快而跌親，導致隻腳骨裂。佢又話自己打石膏、撐柺杖、坐輪椅都試過晒，自己行唔到路嘅時候，先至明白「心有餘而力不足」嘅痛苦咁話。
卓妮