一個星期天的早上，阿亨與阿康在飲茶。亨說︰「康哥，你新開間麵包舖好似幾好生意喎！」康回答說︰「OK啦……咳咳……」亨關心一問︰「咦？你有兩聲咳喎，有冇睇醫生？」康稱︰「都係兩聲咳啫，不過返緊工嗰陣好似咳得多啲！我舖頭有兩個夥計都係咁，都唔知係咪佢哋傳染畀我！」
亨再問︰「會唔會係你新舖嘅設備問題呀？如果無採用適當通風設備或冷空氣流通，令麵粉粒子積聚，同埋冇採用適當嘅呼吸防護器，好容易會吸入好似飄浮於空氣中嘅麵粉粒子呢啲致敏物質o架！長期咁樣可能會患上職業性哮喘病o架！」
康疑惑問︰「職業性哮喘病？係咩嚟o架？」亨答︰「職業性哮喘病嘅病徵同一般哮喘病冇咩分別，患者發作時會呼吸困難、氣促、喘鳴同咳。喺工作期間發作會較頻密，徵狀亦較嚴重，但休假時病情會好轉。職業性哮喘不但令患者身心受到損害同減低生產力，同時亦會嚴重影響企業運作o架！」
康大驚問︰「咁嚴重o架？咁有咩預防方法呀？」亨解釋︰「預防方法有好多，針對番頭先講嘅兩個病因，用有效嘅抽風系統或者打開窗戶，令工作間空氣流通，同時提供適當嘅呼吸防護器畀夥計，都係有效嘅預防方法！」
康追問︰「除咗設備上嘅改善，仲有咩措施幫到手呢？」亨答︰「仲有提供職前及定期身體檢查，可及早發現哮喘病徵狀，防止病情加深。」康稍為放心道︰「好！我一於試吓照做，咁樣夥計抖啖氣都舒服啲啦！」
職業安全健康局
www.oshc.org.hk