政情：顏汶羽「試管行動」解構水管屋
政府話要搞過渡性房屋，有部分仲係水管屋，隨即惹起市民好奇究竟點住呀？有區議員就話要幫市民解開疑團，仲煞有介事咁搞咗個「試管行動」，點知變咗搞爛Gag。
顧名思義，「試管行動」即係實地去睇吓水管屋內外係點喇！由觀塘區議員顏汶羽帶隊，行動開始之前仲話要同兄弟對錶，查實佢都冇戴錶；之後入到屋內，原來早已有另一名兄弟恭候，仲扮到好似有賊入屋咁大嗌，明明有着褲嘅佢，仲專登打格扮冇着褲，擺明係玩嘢喇！
一開枱就撞到腳
三個大男人坐喺水管屋入邊，本來睇落都仲有啲空間，但一開枱就撞到腳，有啲窄喎。跟住測試私隱度，佢哋就攞咗支棍同窗簾布出嚟，但掛極都掛唔到，最後終於發現到一個好處，就係隔音度極高，喺屋內唱歌，出邊一粒聲都聽唔到。唔知大家睇完，係咪對水管屋嘅格局多咗啲了解呢？