政情：潘兆平立會或讓位 勞聯後生仔爭櫈仔
港九勞工社團聯會（勞聯）前日（23日）舉行周年大會，選出新一屆常委，連同立法會勞工界議員潘兆平在內多名常委不再連任。潘兆平雖然已經第二屆擔任立法會議員，但過往「存在感」頗低，經常被遺忘。政圈流傳，潘兆平唔做勞聯常委後，連下屆立法會選舉都未必連任。接任人選方面，外界估計八十後勞聯主席林振昇同勞工顧問委員會（勞顧會）勞方代表周小松都係合適人選，不過周小松接受查詢時講明唔想接任。勞聯正着手年輕化，林振昇到底夠唔夠班接任，定係要潘兆平繼續坐多屆，大家就拭目以待嘞！
勞聯喺前立法會議員李鳳英嘅年代，明顯比較出色，潘兆平接任後就成日好似「隱形」咁，就算係勞工議題，都鮮有見到潘兆平主動發表勞聯嘅睇法。當年發生政改甩轆事件，潘兆平喺表決當日雖未有離開會議廳，但佢不但冇投票，連出席按鈕都冇撳，令人「嘖嘖稱奇」。佢事後話當時情況混亂，根本唔知發生咩事喎！
搞年輕化 80後林振昇夠理想
勞聯換屆後，潘兆平及曾出任勞顧會勞方代表嘅前副主席吳慧儀等多名常委都不再連任，新一屆常委會任期，亦由過往兩年改為三年。潘兆平早前已表明不會競逐連任常委，希望多啲年輕人參與，做好傳承。至於議會工作，就算佢唔再做常委，都仍然係工會嘅立法會代表，喺擴大常委會議中可以一齊開會。
政圈流傳，潘兆平下屆將唔會競逐連任立法會議員，估計已經出任一啲公職嘅林振昇同周小松隨時有機會接任。分析指，周小松係勞顧會勞方代表，夠晒資深，不過勞聯想搞年輕化，八十後林振昇就夠後生，表現亦唔錯，但又擔心未必壓得住場，會唔會最終都係要潘兆平連任，真係冇人知。
被問到下屆仲會唔會連任，潘兆平就話，勞聯未具體傾，佢當年接任都係因為嗰陣時係勞聯主席，如果有新人承擔就最理想，至於最終邊個出選，仲要等勞聯傾喎。
勞方代表周小松唔打算接手
周小松接受查詢時就話，目前冇打算接任立法會議員，因為係好大挑戰，自己冇呢方面嘅準備。咁林振昇係咪合適人選？周話不評論，話勞聯後生仔多，人選都多。
林振昇就回覆話，潘兆平唔選常委，可能係要擺多啲時間喺立法會。被問到會唔會有意做下屆立法會議員，林就話，自己同勞聯都未諗呢個問題，目前都係做好勞聯三十五周年工作，以及吸納多啲會員先啦。