中環出更：搬屋大發現 施榮懷搵番珍貴舊照
唔少人聽到搬屋都覺得麻煩，事關屋企有唔少物品，擔心搬運過程有損壞，又怕會遺失。早兩日善德基金會為新會址舉行喬遷入伙儀式，基金會主席董吳玲玲、常務副主席藍國慶、高級顧問黃均瑜等人當然不容缺席，香港中華廠商聯合會永遠名譽會長施榮懷都有到賀，佢就話搬屋係大工程，但過程中反而發掘到珍貴舊物，到底係咩呢？
施榮懷講起幾年前搬過屋嚟，因為舊屋住咗廿年，直言好麻煩，不過佢就全部交畀太太打理喇。佢仲話，搬屋不但冇整唔見貴重物品，反而搵番唔少舊照，所以佢都叫屋企人唔好將珍貴嘅物品放入倉，而要擺當眼位置，咁就可以成日見喇。
藍國慶喺公司尋回中學紀念冊
藍國慶就話，經常想搵番成績表等學生時代嘅舊物，但係物件愈珍重，就會收得愈埋，久而久之搞到連放喺邊都唔記得喎！不過，早前佢竟然喺公司一個箱入面搵番中學紀念冊，勾番起唔少回憶，大嘆中學時代嘅友誼夠真誠，所以可以維持得最長久。
黃均瑜就平均兩年搬一次屋，因為租約期滿，業主又加租，最長一次都只係住夠四年，所以唔少貴重物品從未喺紙箱拎過出嚟，就又到下次搬屋喇。
講番今次搬會址，董吳玲玲大讚新地方寬敞，所以趁機撥啲地方用嚟品茗，以茶會友同埋交流傳統文化。當日都有切燒豬儀式，董太就話自己每逢開幕、搬遷等喜慶事都會拜神、切燒豬，因為係傳統文化，不過有時參加者因宗教信仰而唔參加，佢就覺得要尊重對方，唔會強迫喇！
卓妮