政情：葉劉爆團友食杯麵醫思港病
有時人離開屋企去外地太耐，都會思鄉病發。最近一班商界同專業界別嘅人士去咗格魯吉亞等地做商務考察，身兼行政會議成員嘅立法會議員葉劉淑儀（葉劉）都係其中一員，佢就大爆有團友喺機場貴賓室食杯麵醫「思港病」添。
抽空遊覽格魯吉亞著名酒莊
葉劉近日喺社交網站貼文同上載照片，講吓今次考察團嘅點滴。佢話呢次行程都幾趕，喺格魯吉亞嘅最後一日，先可以抽空喺城中遊覽，而中午時分佢哋就去咗當地嘅著名酒莊。呢個酒莊喺一八七八年由格魯吉亞皇室繼承人Mukhrani王子建立，佢哋一行多人仲喺嗰度食午餐，之後考察團就轉往匈牙利繼續行程喇。
葉劉話，由格魯吉亞去匈牙利布達佩斯嘅路線較為轉折，首先要向北飛往莫斯科，再由莫斯科向南飛往匈牙利，當考察團去到航空公司貴賓室見到大量即食麵時就好興奮，唔少團友思港情切，就立即食杯麵。好明顯係食得太多西餐，諗起香港美食喇。