政情：莊莎娜多才多藝 自己Set頭十分鐘搞掂
靚女珠寶設計師莊莎娜（Sarah）一向多才多藝，識得寫科幻小說、唱饒舌歌，原來佢仲有一樣才藝，就係幫人恤髮Set頭同化妝。早前喺一個晚宴上，見佢一頭長髮捲得好靚，細問先知係佢自己整嘅，而過程只需十分鐘就搞掂。在旁嘅好友、菁英幗聚副主席王麗貽（Sonia）就好搞笑咁話，Sarah嘅「秘撈」係幫人化妝、Set頭喎。
王麗貽：網紅唔易做
Sarah笑笑口話，佢由十五、六歲開始玩電動捲髮器，都試過辣親塊面，不過後來就熟能生巧，依家都會成日上網學吓新手勢，媽咪同家姐嘅頭髮都係佢整嘅。Sarah又靚又叻，都可以做吓網紅喎，佢就話覺得做網紅好難，因為拍一條片放出街嘅時間好短，但背後需要好長嘅時間準備。
Sonia旗下美容院都有搵網紅宣傳，佢話網紅確實唔易做，平時睇佢哋好似好風光，但係背後要做好多嘢，先至維持到人氣咁話。