政情：換屆冇幹事會提名 港大學生會再「斷莊」
香港大學學生會正式「斷莊」。港大二○一九年度學生會周年大選早前舉行，所有候選學生會中央幹事會大比數落選，會方其後重啟補選提名期，不過直到前日補選提名期結束，都未有收到任何幹事會及普選評議員嘅提名，加上早前補選委員會已決定唔會再重開提名期，所以是次補選將肯定唔會有任何候選人，即本年度學生會正式「斷莊」。今次係港大學生會繼二○一○年後再度「斷莊」。
合作社將停止補給
港大校園電視報道，學生會「斷莊」後嘅問題包括學生會合作社將停止補給，直至署理學生福利秘書被委任；委任署理行政秘書前亦會冇人處理學生會群發電郵系統（bulk email system）；評議會轄下多個常設委員會主席亦會出缺。
喺早前嘅學生會周年大選，候選學生會幹事會內閣「蒼傲」、「晉」均未能通過當選門檻，全員落選。當時因幹事會參選人嘅言行及背景掀起風波，令選舉氣氛熾熱，投票率亦創近年新高。