政情：劉利群搞到一鑊粥 傳照樣升遷財庫局

葉文娟好可能要等下一輪

食環署單計去年已經係多事之秋，劉利群真係鑊鑊新鮮鑊鑊甘，例如公廁衞生超差；滅蚊滅鼠滅唔完之餘，滅蚊隊仲要被揭蛇王；又有拾荒婦明明執垃圾，被人票控亂拋垃圾，搞到滿城風雨才撤控；仲要爆多單被審計署報告揭發食物安全中心嘅食物安全管理漏洞多多，當時有指食安中心運送食物樣本到化驗所，竟然需時近七個月，真係罄竹難書，但咁耐以嚟似乎批評接受、做事依舊，面皮仲厚過本辭淵。

大家都係公務員，職級差唔多，邊個升先，邊個升後，其實同運氣都有啲關係。財庫局常秘黃灝玄傳咗即將退休好耐，聽講今年底真係退嘞，但佢個位就特別難搵人，唔係個個公務員都有財金背景，被政務司司長張建宗暗示過就嚟升嘅有社會福利署署長葉文娟，做過嘅財金職位唔算多，好可能要等下一輪先有得升嘞。

至於劉利群就做過前經濟科、前財政科及前財經事務局（後改稱「財經事務及庫務局」），以及工業貿易署副署長，財金背景及資歷比較多少少，所以就盛傳接任黃灝玄嘅機會大啲。講真嗰句，睇佢搞食環都搞到出晒事，去做財庫局係咪真係掂呢？正所謂「政治一日都嫌長」，仲有大半年時間，真係要放長雙眼睇吓喇。

蔡淑嫻識做人 幫老細擋駕

此外，盛傳創科局常秘卓永興即將喺月底退休，創科呢樣嘢咁新，做生不如做熟，同一個局嘅創新科技署署長蔡淑嫻就因而受惠。睇番蔡淑嫻相當「識做人」，創科局局長楊偉雄未正式上任前，有指蔡已經喺一個活動上幫楊偉雄「擋駕」，聲稱楊偉雄不接受訪問，早早已經同老細打好關係，梗係容易拍住上o架啦！

蔡唔止識做人，仲相當慳家添，去年被撞破喺減緊價嘅平民店買衫，嗰間舖一百元就有交易，當時已經係下午兩點幾鐘，過晒午飯時間，原來該署上班時間咁有彈性，做其他政策局都唔知有冇咁嘅空間呀！