中環出更：搭𨋢跣親輕微骨裂 陳肇始缺席活動
食物及衞生局局長陳肇始原定於尋日上午出席醫療管理學會嘅學術會議，擔任開幕主禮嘉賓，但活動開始時，佢都未見影，原來佢喺前晚唔小心跌親，整傷右手，搞到要去醫院打石膏，之後留喺屋企休息，當局惟有改派副局長徐德義頂上。唔知陳跌一跌，又要幾時先好得番喇。
據了解，陳前晚出席一個公開活動嘅途中，唔小心喺公眾地方嘅升降機中跣親，之後就去咗瑪麗醫院醫治，雖然佢有輕微骨裂，並觸及手腕舊患，但因為冇乜大礙，所以都唔使留院，打完石膏就可以返屋企休息。但佢原定尋日出席多個活動，就無奈要甩底喇。
加入政府後非首次受傷
今次都唔係陳肇始加入政府之後第一次跌親受傷，喺二○一五年十月，當時佢仲係食衞局副局長時，就喺做健身時失平衡跌倒，令右手虎口位舟骨骨裂，要用護腕固定右手，並作為期六周嘅治療，期間佢仲包紮住右手出席立法會會議同不同活動。就咁睇，佢嘅平衡力似乎弱咗啲，係咪要好似古代啲「娘娘」咁，搵人扶住行路會好啲呢？
卓妮