中環出更：王偉樑嘆阿茂整餅唔容易
博愛總理王陳鴛鴦個仔王偉樑（Desmond）喺外國留學返港，前年就接手咗一間本地老餅家，並擔任行政總裁。早前香港中華廠商聯合會搞聚會，加入咗廠商會嘅Desmond都有出席。講起佢接手嘅老餅家，Desmond就話自己都有落手落腳試吓「阿茂整餅」，不過就發現原來整餅並唔係咁容易。
Desmond話，去年中秋節後見到用剩好多鹹蛋黃，就想試吓用鹹蛋黃整蛋卷，但製作時雖然已經放咗一大堆鹹蛋黃，但啲蛋卷都係原來嘅口味，好彩班師傅好肯創新，願意一齊去嘗試，大家終於發現啲材料係要經過特別處理先至出味。問到平時有冇畀師傅恰，Desmond就笑笑口話唔係恰，係教導啫，咁叻賣口乖，難怪師傅都肯出謀獻計。
黃偉鴻呻難搵地方搞跑步活動
同場仲有廠商會會董黃偉鴻（Ellis）、第一副會長史立德及太太史顏景蓮、以及副會長吳國安。做開飲食生意嘅Ellis話，佢嘅生意上晒軌道，近年轉去搞慈善跑。佢又話，依家愈來愈多跑步活動，例如科學園就每周都有，慨嘆多人做運動係好事，只係香港好難搵到場地搞活動喎。而且本身有做運動嘅佢就學緊太極，但係就笑稱自己只係睇得唔打得，得個樣。
另外，身兼廠商會鐘錶業委員會召集人嘅香港表廠商會副會長莫慕潔（Daisy），講起做生意就話以前嘅女企業家經常畀人恰，所以要好勤力工作。Daisy就話，最誇張嘅係試過啱啱生完仔返病床就開始覆電郵，坐月三星期就返工喇，大呻邊有依家有十四周產假咁多喎。
卓妮