政情：陳曼琪公幹記掛愛犬 屋企裝鏡頭日日望
近年唔少年輕夫婦選擇飼養寵物，有啲更會視寵物為己出，關係與家人般親密。香港中小型律師行協會創會會長陳曼琪（Maggie）係愛狗之人，屋企都有養狗。早前佢同新界社團聯會理事長陳勇出發去公幹，陳勇就力證Maggie有幾掛住愛犬豆豆。而Maggie就話佢屋企有安裝鏡頭，所以依家出遠門都可以透過電話望住豆豆喇。
原來陳勇同Maggie兩個已非首次一齊離港公幹。陳勇話，Maggie上次公幹時近乎每日都會講起豆豆，又呻同豆豆分隔咁遠好慘，證明Maggie真係唔捨得離開豆豆咁長時間喎。聽落都覺得Maggie同豆豆好癡纏。
送機把握機會攬到實
而出發當日，Maggie老公都有送機，連豆豆都有同行，Maggie更攬到豆豆實一實，把握上機前嘅機會同豆豆相聚。Maggie話，佢從未試過帶埋豆豆出國，因為寵物出入境過程複雜，最慘係返港後仲要隔離，所以佢都希望研究到一項寵物政策，可以令主人能輕易帶寵物同行。