政情：民政局補鑊 重提西九留位議案
西九文化區工程又超支又延期，早前民政事務局向人事編制小組委員會申請保留三個監察西九文化區工程嘅職位，因為甩轆冇拉票而遭否決。距離職位到期撤銷仲有半個月時間，民政局就急急補鑊，再次將議案提交人事編制小組審議，仲成功打尖，最快喺下周五（22日）嘅會議上討論。雖然可以打到尖，但議案仲要過財務委員會嗰關，如果再甩轆就唔知點搞喇。
稱財會有機制趕死線
根據立法會文件，民政事務局再次向人事編制小組申請保留三個職位至二○二三年三月底，全部都係繼續監察西九文化區計劃。就算小組通過保留有關職位，去到財委會都仲要打尖，先可以趕及死線前通過撥款。民政事務局常任秘書長謝凌潔貞日前被問到擔唔擔心趕唔切過財委會時，佢就話有機制處理喎。
莫非財委會有「特快專線」批錢？財委會主席陳健波笑稱只有「特慢專線」，仲話本來應該要討論律政司法律政策科一個編外職位轉為常額職位，以負責與政制及選舉事務有關嘅必要職務，所以要睇吓當局點樣選擇喎。