政情：民主阿婆偕兩議員 再赴美唱衰香港
有「民主阿婆」之稱嘅前政務司司長陳方安生不時「唱衰香港」，下周二（19日）佢將前往美國華盛頓同紐約十日，同美國國務院官員及唔同政黨議員會面，而今次佢仲同埋兩名泛民立法會議員一齊去添。勞工界立法會議員陸頌雄就鬧爆佢哋，又批評泛民配合美國劇本，甘心做美國嘅棋子，質疑泛民去美國講香港嘅負面情況，令美國有「彈藥」向香港施壓係咪合適。
今次同民主阿婆同行嘅泛民議員有資訊科技界莫乃光同法律界郭榮鏗（Dennis），佢哋話會去傾吓香港獨立關稅區、聯繫匯率、互聯網自由等議題。Dennis話，美國將會提交香港政策法報告畀國會，佢批評早前指香港冇咗政策法都冇問題嘅財政司司長陳茂波係「癡人說夢」，認為如冇咗政策法，香港將失去國際地位。而近日政府建議修訂《逃犯條例》，佢都會去反映有關情況。
陸頌雄：冇必要由美干預港務
陸頌雄就認為香港事務冇必要由美國干預，美國人權標準參差，亦冇資格談論人權，希望泛民唔好扭曲香港情況咁話。