政情：葉劉鬧爆 甩轆冇影瓣瓣齊 副局政助水平低
政府由二○○八年起開設副局長同政治助理職位，不過佢哋嘅工作表現相當參差，特別係政助，唔單止久唔久就出現甩轆事件，有啲更被議員投訴影都冇。身兼行政會議成員嘅立法會議員葉劉淑儀（葉劉）就會喺本月二十七日立法會大會，質詢政府到底聘請副局長及政助時有冇統一標準，同埋有否為佢哋提供相關培訓等，換句話咪即係覺得佢哋唔夠水平囉。葉劉接受查詢時仲點名提到財經事務及庫務局嘅政助最少蒲頭，而且唔止係現任政助，就連過往歷任都係咁。睇嚟該局局長劉怡翔、副局長陳浩濂要快啲拉佢哋嘅政助楊寶蓮現身至得喇。
伍潔鏇楊寶蓮「似局長跟班」
葉劉提出嘅口頭質詢直指依家嘅副局長同政助表現參差，要求政府回應究竟有冇定期檢討佢哋嘅職能同效率、係咪有為佢哋提供針對政策游說技巧、傳媒及公眾聯繫工作嘅專業培訓課程，同埋會否考慮遴選時加入客觀入職條件同考核，提高副局長同政助嘅專業水平。似乎葉劉對依家嘅副局長同政助嘅專業水平唔多滿意。
葉劉就話，目前政助嘅水平好參差不齊，當中係有比較勤力嘅政助，幾乎逢周三立法會大會同周五立法會財務委員會開會都會出現，不過有啲就極少現身，就算當日會議有需要向議員拉票嘅項目都唔見影，甚至有政助係連議員主動聯絡都未必搵得到，根本就做唔到當初政府開設有關職位，希望做好政治聯絡工作嘅原意。
葉劉又直指，咁多個政策局當中，財庫局嘅政助佢就見得最少，由當局首任政助伍潔鏇，到現任嘅政助楊寶蓮，都好少出現拉票，唔清楚佢哋平時做啲咩工作，形容佢哋好似只係負責跟住局長周圍應酬嘅跟班咁。葉太又話，雖然都唔排除佢哋有幫局長做研究或寫稿，但認為呢啲工作請個研究助理就得，毋須以咁高人工去請政助。
黎穎瑜馮興禮被議員投訴
今屆政府嘅副局長同政助屢次發生甩轆事件，最近一次就係民政事務局上月就西九發展區計劃提出嘅保留職位申請，被葉劉擔任主席嘅立法會人事編制小組委員會否決，當時民政局政助黎穎瑜就被質疑冇拉票，而勞工及福利局嘅政助馮興禮亦都曾經被議員投訴隱形。今屆政府政助嘅月薪由約八萬多元去到約十二萬元，係唔係值咁高人工就要視乎佢哋個人表現，如果連議員都投訴佢哋，試問又點可以話已經打好呢份工呢？