中環出更：電子煙法案委員會 郭偉強料做主席
政府宣布修例全面禁止電子煙或加熱煙，負責審議嘅立法會《二○一九年吸煙（公眾衞生）（修訂）條例草案》委員會將於下周一（18日）召開首次會議，並選出委員會主席。外界對政府禁電子煙意見紛紜，料修例亦難以一帆風順。據了解，政府同建制派已屬意由議員郭偉強出任該法案委員會嘅主席，唔通貪郭唔係「煙民」，夠公道？
下周一首次開會
立法會中唔少議員都係煙民，甚至同煙草商及煙民組織有聯繫，對政府一刀切修例自然有意見。委員會下周一開會，有煙民組織已發起到立法會請願，料到時都會有建制派議員到場。如果由撐煙民嘅議員做委員會主席，政府都咪話唔擔心。
雖然立法會都有其他關注電子煙問題嘅議員，包括喺禁煙立場上同政府相近、本身為醫生嘅郭家麒同醫學界陳沛然。不過，政府又點會放心畀非建制派「揸莊」﹖而建制派人選方面，郭偉強早喺一五年、即上屆立法會任議員時已要求當局關注，只係政府歎慢板到去年先開始討論，所以郭對呢個議題嘅熟悉係毋庸置疑。
卓妮