中環出更：撐老友周鎮榮場 楊立門應邀獻唱
早前荃灣商會（商會）舉行成立八十周年慶祝晚會，有「AO歌王」之稱嘅中華廠商聯合會行政總裁楊立門（Raymond）都有現身，原本以為佢係代表廠商會出席畀面派對，細問先知原來佢同荃灣有特別淵源，佢喺上世紀九十年代初就做過三年政務專員。佢笑笑口話同商會理事長周鎮榮好熟，對方邀請佢出席兼上台獻唱，梗係要嚟支持咁話。所以話，識於微時嘅感情真係最真摯喇。
諗起當年喺荃灣嘅工作，Raymond話印象最深刻係做幾條舊街嘅重建，即係依家嘅住宅項目萬景峰，呢個係市區重建局已完成嘅最大規模重建項目，當時要做好多地區諮詢。講講吓，佢仲喺場刊中發現自己當年出席區內活動嘅舊相，相中嘅佢青靚白淨，成個o靚仔咁，真係有趣。
當晚區內重要人物空群而出，包括商會永遠榮譽會長朱松勝同埋其身兼仁濟總理嘅兒子朱德榮，而仁濟候任主席王賢訊及一眾董事局成員都有去撐場，事關當年商會有份創辦仁濟，所以長期都有商會代表加入仁濟董事局。周鎮榮太太、香港中國婦女會主席周梁麗芬都一早到場招呼賓客，期間同喺荃灣住咗三十幾年嘅香港工商總會荃灣分會主席劉劉寶芝都好好傾。
朱松勝話金行代表荃灣發展史
朱德榮嘅家族喺荃灣扎根八十幾年，做金行起家，佢話雖然依家已轉型投資物業同餐飲業，不過至今仍然保留兩間傳統金行，畀八十幾歲嘅爸爸得閒巡視吓，生活有啲寄託。朱松勝就笑稱，自己每朝都會返金行睇吓生意同夥計，仲會因應金價價位建議夥計買唔買貨。佢又話兩間地舖如果放租，其實仲和味過做金行，不過金行代表住荃灣嘅發展歷史，唔可輕言放棄喎。
卓妮