政情：鄭松泰 何君堯 無緣同台隔空開火
香港大學學生會政治及公共行政學會尋日舉辦一個研討會，以學術角度討論民粹與民粹民主。出席者之一嘅立法會議員鄭松泰朝早喺社交網站發貼，話係以為另一立法會議員何君堯會出席先至答應去，言語間透露出點點失望，唔通佢覺得畀人呃？
何笑對方成日踩蕉皮跣低
鄭松泰回覆時話唔可以話係呃，不過何君堯唔去就真係會考慮吓先。點解想同何君堯同台？佢就話一個論壇應該要有正反兩面，咁離開會議廳辯論就唔使理會議守則，可以毫無顧忌咁「收拾佢（何君堯）」，揭開佢嘅歪理，可惜佢最尾同學生講話唔得閒。
何君堯話依稀記得一早回覆咗唔得閒到場，仲話自己向來「逢請必到，逢到必早」，但尋日真係有事。問到點睇鄭松泰對佢唔出席感到失望，佢就話鄭鍾意「砌佢」，但又砌唔到，成日踩蕉皮跣低，笑言下次有機會咪一齊砌囉！兩人無緣喺研討會激辯，各自回應都已火花四濺，相信同台嘅話必然會更火爆。