政情：甩轆後重提議案 楊岳橋被截胡
香港地少人多，好多資源都相當緊張，所以有立法會議員相當關心單程證呢項人口政策，其中公民黨（公文袋）議員楊岳橋（AY）今年一月就曾經喺立法會有一個關於單程證嘅議員議案，但佢竟然甩咗轆，因不在席而無法提出動議，搞到AY要喺佢黨友相讓下，先有機會喺本月二十七日重提議案，但原來另一議員范國威（Gary）亦將會喺本月二十日提出改革移民同入境政策議案，內容都包括削減單程證，唔單止同AY撞題目，仲有截胡之嫌喎。
被指抄襲 范：已盡力做到最好
Gary解釋，佢都係早一兩日先知AY會重提單程證議案，即係佢入紙申請提動議時並唔知情，而且當初已嘗試避開「疑似搶題目」嘅尷尬情況，例如佢知道自己抽到動議時，已經率先通知AY辦事處，而議案內容亦唔相同，唔單止會講單程證，仲會加入討論來港人士入境後嘅欺詐行為、研究「返回機制」，同埋近日嘅醫療爆煲問題等，範圍比AY一月時嘅議案更闊。
至於仍有聲音批評Gary抄襲兼截胡，Gary認為已經係The best I can do（已盡力做到最好），重申自己長期關注單程證政策問題，加上一月AY甩轆後佢都曾經表示會循其他途徑繼續跟進，當中包括自己抽議案，所以今次只係延續當時嘅工作。不過依家基於立法會程序，Gary嘅議案已經唔可以再改動，相信AY見到咁嘅情況都會考慮改題目。
楊話冇夾過 「英雄所見略同」
至於被截胡嘅AY就直言冇同Gary夾過，所以先撞題目，但佢認為議案題目並冇monopoly（壟斷），任何人都可以申請講呢個題目，加上一月時的確係自己失誤，所以並冇因為被截胡而失望，反而已經着手同立法會秘書處處理緊改題目事宜。AY形容同Gary係「英雄所見略同」，強調多議員關注同一個議題係好事，而佢亦都會就Gary個議案提出修正案，講番一啲自己想講嘅內容咁話。