政情：旗下零食廠發現手榴彈 戴胡美蓉反指有意外收穫
早前有零食廠喺入口薯仔中發現手榴彈，涉事嘅廠房係人稱「零食王后」嘅香港女童軍總會副會長戴胡美蓉旗下嘅，佢講起當日情況都話好緊張，因為未知手榴彈係咪有意藏喺薯仔中。後來調查後先知道，手榴彈係九十幾年前喺德國製造，之後投擲喺法國農場，近期咪被挖出送到香港囉！
證薯仔法國入口 訂單增
戴太笑稱，今次事件有驚無險，仲有意外收穫，因為令到唔少人知道佢哋所用嘅薯仔來自法國，所以農曆新年前薯片訂單大增添！
戴太更分享點樣揀薯仔，話要配合機械生產，所以要挑選形狀相近嘅薯仔，以免薯片唔夠美觀。佢哋選用嘅薯仔產地唔止法國，亦有部分來自新西蘭，因為要分散投資，避免受薯仔因失收、天氣等情況而影響薯片生產咁話。