政情：謝偉銓遊塘西 電車上撞「鬼」
西環屈地街到堅尼地城一帶叫石塘咀，以前係風月之地，自從石塘咀紅燈關閉，一段三十年嘅塘西風月史就結束。立法會建築界議員謝偉銓（Tony）早前湊熱鬧去遊塘西，竟然撞「鬼」！唔係呀？咁驚嚇！
參加復古主題電車派對
話說早前突然有好多「旗袍女」同「唐裝男」喺塘西徘徊，相當詭異。而Tony亦身處其中，身邊仲有好多「旗袍女」，唔通佢畀女鬼纏身？仲有道士在場，唔通係驅鬼？其實Tony身邊有好多鬼火咁靚嘅女士就真，因為佢哋係搞緊新春電車派對，服飾主題係復古裝扮，所以女性就着旗袍，男性就着唐裝，仲有人打扮成道士，難怪咁似七月鬼節啦！
咁有趣嘅電車派對，Tony都着咗一身唐裝參與，雖則佢唔係猛鬼纏身，但就真係撞到鬼，事關有人喺佢身後扮鬼臉吖嘛！