政情：戴澤良妙計「過牆梯」破美國天價圍牆
美國總統特朗普上任之後，多項涉及內政或外交嘅政策均十分惹火，喺美國同墨西哥邊境起天價圍牆就引起巨大爭議。十分關注中美貿易戰進展及特朗普施政嘅中華廠商聯合會名譽會長戴澤良（Tony）笑笑口話，中國人話：「你有你的張良計，我有我的過牆梯」，上網搜尋一下，即可喺內地購物網搵到好多長約三十呎、可伸縮嘅超長梯，售價只係四十美元，只需幾十條，每日就可以輕易畀數千名非法入境者進入美國，一招即擊倒特朗普喎。聽落好搞笑，但又有幾分道理。
指亦需有足夠邊境人員
Tony仲喺手機展示上網搵到嘅伸縮長梯，五花八門乜都有。佢話特朗普為咗杜絕非法入境者，竟然要國會批出相等於四百幾億港元嘅經費，事件仲搞到政府停擺、八十幾萬名公務員冇糧出，依家雖然政府恢復運作，但係佢宣布國家進入緊急狀態以取得撥款，引起更多訴訟，真係永無寧日。Tony笑稱，就算天價圍牆真係起好咗，若果冇足夠嘅邊境人員時時刻刻把關，又點阻止非法入境者利用「過牆梯」入境呢？