政情：張永森不滿譴責動議還拖 12區議員收律師信
深水埗區議會民主派議員喺今年一月擬提動議狙擊「放生黎智英、唔告梁振英」嘅律政司司長鄭若驊，要求討論前特首梁振英UGL案，惟區議會主席張永森行使主席權連番拒絕，民主派炮轟張「釋法」濫權。事隔近一個半月，民主派上月底擬提動議譴責張永森再被拒絕，本身為律師嘅張更加變本加厲，向民主派議員發律師信，指動議內容涉誹謗要求撤回。區議會主席被譴責係罕有，但都冇理由發律師信，張永森好似未係搞得清楚自己身份喎。
事件緣於去年底，該區議會十一位民主派議員要求討論UGL案，張永森以冇迫切性為由唔畀討論。至今年一月大會，再有議員即場動議討論，並獲在席過半數支持，張卻引用會議常規話，條文英文字眼寫主席「May（可以）」接納動議，佢就選擇拒絕，引來在場議員怒轟「釋法」濫權。直至上月底，民主派議員再動議譴責張永森，並擬修改會議常規漏洞由「May（可以）」變為「Should（應該）」，可惜同被拒絕。及後民主派十一人加上報稱獨立嘅甄啟榮，合共十二人陸續收到律師信。
信中指動議涉誹謗促撤回
根據我哋取得有關律師信，張永森為該律師行嘅顧問，信中分別引用《區議會條例》及深水埗區議會常規，以證明張永森於一月大會嘅裁決係有例可依，信中認為議員所提譴責動議含有非常嚴重但毫無根據嘅誹謗性描述，一旦公開文件，將對張構成名譽損失，要求於二月二十八日撤回，否則採取法律行動。據悉，所有收信嘅人都冇回覆，仲準備喺今天大會上車輪式發口頭聲明譴責。
區議員伍月蘭承認喺上月收到律師信，仲捉到封信有錯字，笑言張永森叫大家「徹」（撤）回動議，唔知係咪想叫人徹底咁譴責佢，形容連通過嘅動議都唔畀傾，大家覺得濫權，係感受嚟，唔認同係誹謗。
何啟明斥張「小家」圖滅聲
同樣收到信嘅民協何啟明就直斥張「小家」，企圖用律師信叫大家收聲。我哋向張永森查詢，但至截稿前仍未收到回覆。
深水埗區議會共有廿三名議員，建制與泛民議員人數各佔十一席，甄啟榮長期以來都係關鍵一票，基本上只要甄支持嘅動議必獲通過。有民主派中人猜測張永森見甄有和議，擔心譴責動議會通過先至畀埋律師信佢，諗住用呢招反壓制民主派。不論出發點如何，立法會都討論過不信任主席梁君彥嘅動議，做得主席就要食得鹹魚抵得渴，以政治智慧判斷，發信搞大件事又何必呢？