中環出更：乳鴿認低威 氹李華明幫黨籌款
環球經濟不穩，慈善機構籌款都唔易，何況係政黨。民主黨（白鴿黨）今個月下旬將舉行籌款晚宴，籌款目標定喺四百萬元，同去年相比係零增長。早前黨內「吸金王」、立法會前議員李華明（Fred）因為該黨決定唔邀請特首林鄭月娥出席，憤而退出籌款委員會（籌委會），黨內「乳鴿」終於認低威，承認擔心對籌款有影響，話要氹吓Fred繼續幫手，希望將影響減到最少喎。
白鴿黨尋日公布晚宴詳情，被問到Fred退出籌委會有冇擔心影響籌款，該黨副主席就話唔擔心就假，形容Fred係最幫手同主力籌款嘅人，希望可以繼續合作，將影響減到最低，仲賣口乖話Fred同該黨前主席劉慧卿都係黨內重要及珍貴資源。
袁海文唔敢將目標定太高
籌委會主席袁海文就話，今年筵開六十席，比去年多六至七席左右，但商界對經濟前景悲觀，所以唔敢將籌款目標定得太高。此外，至今已有十九位司局長回覆出席酒會，但係冇人留低食飯。
卓妮