中環出更：長者照顧者乏支援 簡陳擷霞冀增日間中心
香港進入高齡化，唔少人屋企都有八、九十歲老人家。早前圓玄學院、仁愛堂及博愛醫院合辦春茗嘉許長者義工，博愛副主席簡陳擷霞就話，社會對長者嘅支援已相對足夠，反而照顧者難搵又欠缺支援，最好係成立多啲日間長者中心，就近支援照料長者嘅人，咁樣仲實際。咁啱早前政府公布財政預算案之後，社會有聲音批評政府缺乏照顧者政策，睇嚟呢個問題真係唔可以輕視。
簡太咁講係因為有切身體驗，佢話以前都要照顧年長嘅父母，仲請咗兩個家傭加埋一位護士照顧，但係佢唔同父母同住，冇人喺屋企時，工人免不了會蝦老人家，結果要兩頭走，好辛苦，所以佢好明白照顧者嘅難處。
王陳鴛鴦鼓勵長者多郁動
圓玄學院副主席湯修齊、博愛主席吳錦青、總理王陳鴛鴦及仁愛堂主席羅台秦家中都有老人家，佢哋都認為，長者最緊要精神有寄託，自然身體好。王陳鴛鴦話，以前嫲嫲未過身前，因為手腳慢，於是屋企人就搵專人服侍佢，結果情況反而更差，所以如果時光倒流，都係要鼓勵長者多啲郁動。依家佢媽媽鍾意去街，不知幾精神，如果日日留喺屋企仲閉翳咁話。
羅台秦嘅媽媽已經九十幾歲，佢話多年前佢弟弟從美國辭工返台灣陪伴媽媽，仲請埋二十四小時看護照顧，將媽媽照顧得好好。但係佢都希望媽媽身體好啲時，可以出去行吓，融入社區。
安老事務委員主席林正財及前主席梁智鴻都有到場打氣。講起外國流行「時間銀行」，即係由啱啱退休嘅人士服務年紀更大嘅長者，然後將服務時數儲存落嚟，日後有需要嘅時候可以好似「提款」咁免費享用服務，林正財就話香港已有社區試行緊，希望日後可以喺全港大力推行。
卓妮