建制派最大政黨民建聯於四月進行領導層換屆選舉，要進身領導層嘅前提係於黨內中委選舉脫穎而出，沙田區議會副主席彭長緯棄選中委，換言之其黨內副主席職務勢必有新面孔，綜合多方消息指預料會係「三揀一」，即該黨秘書長陳學鋒、副秘書長葉傲冬及鄭泳舜之爭。
據知民建聯中委選舉已截止報名，現任中委有五人放棄連任，包括出任該黨副主席六年嘅彭長緯，最終有六十多人報名競逐五十二個中委位置，現時該黨領導層多人包括副主席陳克勤、周浩鼎、陳勇等料會順利連任，至於彭留下嘅副主席空缺，有分析指參與黨務工作多時，近年瞓身大打網絡戰嘅秘書長陳學鋒，更上一層樓最為順理成章，一切視乎陳嘅個人意願。
不過，該黨內部亦有聲音指，目前黨內五名副主席，連同彭在內共有四人來自新界，另一人係來自港島嘅立法會議員張國鈞，唯獨係九龍冇代表，故從平衡各方勢力層面出發，油尖旺區議會主席葉傲冬及「雙料議員」鄭泳舜喺黨內人脈及地區經驗，亦係「升呢」嘅合適人選。
外界預料，陳、葉及鄭三人最終邊個脫穎而出，唔單止係黨內事務，隨時牽一髮動全身，影響埋明年選戰嘅布局，因此一般相信，黨內元老勢必反覆研判才會最後拍板作實。