政情：基建多甩漏 胡應湘批政府畏首畏尾
政府施政失誤連連，唔單止無法有效監察港鐵沙中線等基建項目，多項民生措施亦諸多甩漏，市民怨聲載道。香港理工大學前校董會主席胡應湘尋日出席理大工商管理學院舉辦嘅論壇時，就直指種種問題嘅根源係現屆政府處事畏首畏尾，佢仲叫政府唔好再行「妥協政策」。
轟沙中線工程水準失敗
胡原本喺論壇上講緊教育相關問題，一度引述理大前校長潘宗光指理大宗旨係有教無類，而學生進入校園只有三至四年時間，必須盡力將佢哋培訓成材。不過依家政府處事畏首畏尾，無法配合校園發展。佢仲話政府唔應該再實行「妥協政策」，凡係「妥協政策」都唔會成功。
胡又提到香港多次出現工程問題，批評已爆出連串醜聞嘅港鐵沙中線工程水準「失敗」。事實上沙中線過去醜聞不斷，包括有鋼筋被剪短、鄰近建築物沉降超標等，胡用「失敗」二字形容絕對唔過分，如果政府唔調整吓啲施政方針，日後只怕會有更多「失敗作」畀人鬧喇。