政情：鬧泛民發癲 波哥掀罵戰 財會火花四濺

尋日嘅財委會議程冇乜爭議，但唔知點解波哥就相當肉緊，多番提醒議員盡快發問，而討論咗個幾鐘頭後順利表決，冇人反對，但點知波哥質疑議員點解要嘥時間提出記名表決喎。佢仲話財委會應該只談財務，議員有其他問題可以聯絡政策局了解，話自己主持會議過於寬鬆要檢討，惹來泛民議員不滿。

畀人叫收聲 何君堯爆粗

議員范國威之後就正經發問，但到發言尾聲時，就強調自己嘅問題好有意義，問波哥聽唔聽到，結果波哥就話佢發癲、顛倒是非，隨即又引發一輪爭執，泛民認為冒犯要求波哥收回言論，但波哥當然企硬啦，結果會議一度暫停。不過，會議暫停並未有令怒火熄滅，議員何君堯仲發火與泛民對罵，議員陳淑莊答得相當激動，喊晒咁款要其他泛民安慰，更有人叫何君堯「Shut up」收聲，但何並非省油的燈，竟然爆粗回敬「Shut your big axxhole up」。

姚思榮圖撲火 何唔領情

會議室火藥味甚重，議員姚思榮都企圖撲火，拍何君堯膊頭叫佢離開會議室冷靜下，點知何就唔領情，話明「你要拗我同你拗，冇人阻到我」，仲話班泛民「有人大聲過你哋就驚」。有泛民議員心水清，知道會議暫停期間冇直播，大話「最衰無片」，但隨住會議室開始有鏡頭出現，何竟然自動收火。

會議恢復後，波哥容許議員一次過發言再一併回應，議員郭家麒就話作為醫生，好介意波哥話人「發癲」，不但係對其自身人格侮辱，亦對精神病患者唔公平，應該要致歉。至於何君堯又回復平靜正常發言，批評泛民叫囂同插嘴在先，認為波哥講發癲只係符合實情，並無挑釁性喎。

波哥就重申並非侮辱及歧視精神病患者，「發癲」一詞只係佢當時嘅感覺，因為議員對主席挑釁同侮辱，不過佢自己都明白唔適合成日講，希望大家都唔好互相攻擊喎，終於令呢場鬧劇落幕，會議回復正常。其實議員有權要求記名表決，如咁都話嘥時間，因此而掀起爭拗，就更加嘥時間啦！