中環出更：開會又失蹤 聶德權陳帥夫遭追擊
《國歌條例草案》具爭議性，無論建制派定民主派嘅立法會議員均「冧友」加入該法案委員會。尋日法案委員會舉行第二次會議，不過負責有關法案嘅政制及內地事務局局長聶德權同副局長陳帥夫就冇影，有民主派議員會上追問佢兩個去咗邊，質疑聶唔重視個會。
鄧忍光：分工由局長決定
尋日會議只有政制局常任秘書長鄧忍光等代表出席，議員陳淑莊（Tanya）就問點解聶德權唔見咗，法案委員會主席廖長江就話佢聽聞聶唔喺香港。鄧就解釋，聶要去北京出席一個重要會議。
Tanya於是又再追問陳帥夫點解唔出席，鄧再解釋話該局嘅分工係局長決定。Tanya聽完就話，立法會之前審議《廣深港高鐵（一地兩檢）條例草案》時，雖然運輸及房屋局局長陳帆經常好似小學生常識問答比賽咁，要商量完先回應議員提問，但至少次次都出席。
廖長江就再次幫口，話行政安排等當局去負責啦。不過Tanya唔罷休兼鬧埋建制派，批評佢哋唔出席會議或點完名就走，反問佢哋有幾尊重國歌法討論。
卓妮