中環出更：飲食業引入科技 盧浩宏：過唔到自己嗰關
科 技日新月異，可以應用嘅範圍愈見廣泛，連廚房都見到機械人幫手炒菜。早前有個飲食界活動，唔少飲食界名人雲集。大家講起科技融入業界時，現代管理（飲食）專業協會會長盧浩宏就話，業界引入科技無可厚非，但佢就仲未過到自己嗰關喎。
當日為現代管理（飲食）專業協會、香港餐飲聯業協會、稻苗學會同香港餐務管理協會合辦嘅團拜，上述四會嘅主席梁志偉、謝寶達、徐汶緯同梁振華、香港餐務管理協會永遠會長潘權輝、香港餐飲聯業協會會長李遠康等業內名人傾巢而出。
經營酒樓嘅盧浩宏話，業界引入科技已有一段時間，喺新加坡都非常普遍，但佢就認為香港人仍未接受到，尤其點心製作比較講究，擔心機械製作嘅蝦餃令蝦雪得太耐唔夠脆、皮又變得太韌。飲食業界的確用多咗科技，傳統手藝會否失傳？佢就認為只要食客願意畀錢，就依然食到好嘅手藝，所以唔怕傳統會消失。
從事海味生意嘅潘權輝都會喺包裝方面使用科技，但處理海味嘅工序就仍然依賴人手，佢舉例話，浸發鮑魚時夠唔夠腍就要專人判斷，因為每一隻鮑魚情況都唔同。睇嚟人手都未能完全被科技取代嘅。
黃永幟：人手烹調至有人情味
同係現代管理（飲食）專業協會會長嘅黃永幟就認為人手烹調嘅食物能夠食出人情味，有得揀都會揀由人炒出嘅餸菜，因為可以食得出對方嘅心機。不過佢都認為業界請人困難，搵到有心機嘅人就更難，目前只能靠福利去吸引新人入行，所以引用科技都係好方向咁話。
卓妮