政情：黨友雞手鴨腳 范國威親自煮湯圓
尋日農曆正月十五元宵節，傳統要食湯圓慶團圓。不過，煮嘢食就唔係人人都拿手，新同盟一班男執委就搞到「捩咁棄」，連落湯圓先定落糖先都討論一大輪，最終由該黨立法會議員范國威（Gary）落手煮。
切蛋糕又搵唔到膠帶
新同盟喺一○年成立後，今年先第一次搞傳媒新春團拜，仲咁啱揀咗喺輪任召集人兼大埔區議員周炫瑋三十一歲生日正日舉行，唔少黨友戲言周擺明係想大家幫佢慶祝生日。
而多年嚟都係陽盛陰衰嘅新同盟，執委清一色全男班，但佢哋好有心應節煮湯圓畀大家食，但就唔知落糖定落湯圓先，要傾過講過先開煲煮，最後交畀Gary負責煮。轉個頭到切蛋糕時，佢哋又搵唔到張膠帶，要三、四個人一齊搞。睇嚟係時候要諗吓吸納多啲女成員，就唔會咁「捩棄」喇！