政情：羅致光睇病 只搵婦科醫生
勞工及福利局局長羅致光出名智商高，但原來身體就麻麻，腸胃同呼吸系統都唔係咁好，好容易病，佢尋日同傳媒午宴時，講起平日淨係睇婦科醫生，仲試過急召婦科醫生幫佢喺車入面打針添！
自爆識睇掌 但唔識事業線
羅致光話自幼身體差到家人以為佢養唔大，仲記得工人以前揹住佢講「光仔唔好死呀」，後來大個咗，腸胃依然好差，以前做立法會議員，試過同黃宜弘等多名議員飲咗廿幾杯烈酒，仍然冇醉可以表演單腳跳，點知第二日腸胃唔舒服到全日唔可以食嘢。不過佢好少睇醫生，要睇都淨係睇婦科，因為哥哥係婦科醫生，佢試過揸揸吓車急性腸胃炎，覺得極痛，打電話畀哥哥，相約喺港大附近，停車喺車入面急急除褲打針。
佢又自爆識睇風水之餘，仲識睇掌，細細個已經睇到自己會做官，但有次有人講起，現場啲女仔着得咁密實，都睇唔到事業線，佢聽唔明，以為人哋戴咗手套。
至於社交媒體，佢話好少玩，Facebook只有兩個朋友，一個係社創基金，一個係社聯行政總裁蔡海偉，加蔡海偉係因為想睇佢啲嘢喎。被問及羅致光同公務員事務局局長羅智光撞名，佢話曾經有人以為佢做兩個局喎。