政情：傳張學明退下火線 林奕權認有意戰鄉委會
廿七鄉鄉事委員會（鄉委會）即將換屆，下月就會陸續選出新任正副主席，當中大埔鄉事委員會主席張學明盛傳退下火線，有指將由大埔南華莆村代表林奕權接替上陣。林奕權昨亦有亮相與一眾鄉頭打招呼，並承認有意向鄉委會試吓發展。
張學明憑鄉委會主席而成為區議會當然議員，現時更身兼大埔區議會主席等公職，所以林奕權接棒鄉委會嘅傳聞，就令人猜想係咪意味佢會接手埋張嘅其他職務，而喺尋日嘅鄉議局執委會上亦見到林嘅身影，見佢頻頻同唔少鄉頭握手打招呼。
林奕權承認有意喺鄉委會中有所貢獻，至於其餘崗位言之尚早，因為一切都要待鄉委會換屆先再作打算，第一關要當選鄉委會執委。
稱冀為鄉民解決問題
現年三十九歲嘅佢就話覺得鄉委會成員年齡偏高，希望出一份力幫前輩同鄉民解決問題。佢就同張學明同屬林村，已經認識一段長時間，但係就唔單止向張學明一人取經，認為最重要了解歷史、傳統權益等，而佢本身係鄉議局顧問，睇嚟對鄉議局事務並不陌生。