政情：角色對調 鄺志堅出山 幫何啟明接棒

本身係大律師嘅鄺志堅出身工會世家，一直喺九龍東同立法會前議員陳婉嫻（嫻姐）「拍住上」，佢二○○四年曾任立法會勞工界議員，卸任議員後，自立門戶做政治顧問專責為建制派新人抬轎外，更曾應徵過勞工及福利局副局長，但最終冇入政府，一度表明打算退休脫離政壇。

熟悉九東 助世代交替

工聯會喺九龍東雖似穩有一席，但面臨黃國健交棒畀何啟明，仍有相當多不穩定因素。鄺志堅今次出山幫手，都直言九龍東喺嫻姐打落嚟後，其他地區團體進步大，令到工記會員流失，會員被吸納到其他團體，競爭好大，何啟明接班特別辛苦，自己對九龍東好熟悉，見到依家工記正處於世代交替，今次幫手希望確保交棒成功。

佢又透露，以前何啟明曾跟過佢做嘢，依家自己就做番何啟明助理，佢自言對工記唔係講錢，老土啲講，係有個責任，人工都係話隨便，但就唔可以做義工，因為義工冇身份，做助理才是真正落腳做，做啲嘢又到位啲，所以過年後就開始正式返工。

何啟明就話鄺志堅一直都係嫻姐軍師，二人一拍即合，希望搞好工記，自己助理普遍都係八、九十後，最後生嗰個都係得廿三歲，就算幾叻都要有人帶，鄺志堅以往係高手，好多計仔，無論係嫻姐同黃國健扮武松打虎，定係九龍東興建東九龍過山鐵路線都係鄺志堅嘅主意，對方仲好體恤佢，大幅降薪，只係收少少車馬費，如果畀到足，怕要成份開支都畀晒咁話。